Compostela Valley Province - Gisugdan na ang dakong engkwentro sa paugnat sa kusog nga gihimo sa pinili ug hinashasang mga atleta gikan sa mga kalungsuran atol sa tulo ka adlawng “7th Provincial Summer Sports Fest 2015.”
Gidula sa tulo ka adlawng paugnat sa kusog niadtong Mayo 20-23, 2015 ang mga Sports Events nga Basketball, Volley Ball, Soft Ball, Base Ball, Soccer/Football, Athletics, Sepak Takraw, Chess, Badminton, Table Tennis, ug Lawn Tennis.
Ang “7th Provincial Summer Sports Fest 2015” gisugdan sa usa ka dakong Motorcade niadtong Mayo 20 sa buntag sugod sa kapitolyo paingon ug pabalik sa Poblacion Nabunturan nga diin miapil niini ang mga players, coaches, ang mga dagkong opisyal sa lungsod ug sa probinsiya, ug ang uban pang mga katawhan sa Comval nga mahiligon sa Sports.
Human sa Motorcade ang Opening Program nga gipanguluhan nila Provincial Sports Coordinator Francis Secuya ug Provincial Sports Consultant Senior Board Member Tyron Uy ug mga kauban nga sila SP Member Raul Timogtimog, SP Member Macario Humol, SP Member Joseph Jaoud, Education Supervisor Ruben Reponte, Municipal Sports Coordinators, ug si Executive Assistant Isabelo Melendres nga maoy mihatag sa Welcome Message ni Gov. Arturo “Chiongkee” Uy.
Mihatag sad sa iyang inspiring message ang taga Comval nga “2015 Palarong Pambansa Taekwondo Gold Medalist” nga si John Paul T. Canillo sa Maragusan, ug sa iyang mensahe iyang gipasabot nga base sa iyang kasinatian makab-ot gyod sa usa ka maayong atleta ang dakong kalampusan sa iyang mga pangandoy ug tinguha kon siya duol kanunay sa Ginoo, 100% nga focus sa training, ug nga duna siyay hugot ug lig-ong pagsalig sa iyang kaugalingong katakos (self confidence) nga modaug sa dula.
Ang dula gisugdan human ang mensahe ug declaration of the Opening sa “7th Summer Sports Festival 2015” nga gihimo ni Senior Board Member Tyron Uy, ug matud pa niya nga gawas sa competition labing mahinungdanon sad sa gihimong indigay sa paugnat sa kusog nga mapromotar ang panagsuod ug panaghigalaay sa tanang mga atleta ug sports enthusiasts sa tibuok Comval Province. (Gilbert Cabahug/ IDS Comval)
Photo captions:
An action-packed day as Compostela Valley opens its 7th Provincial Sports fest on May 20 spearheaded by the Physical Fitness and Sports Development Council. Games such as Badminton, Soccer, Billiards, Chess, Sepak takraw, Volleyball, among others are played by young athletes from the 11 municipalities. (a. dayao/ IDS Comval)
